Ish-politikani, njëherit avokati, Azem Vllasi, vlerësoi që në gjykimin ndaj ish-pjesëtarëve të UÇK-së, ka pasur shkelje dhe moszbatim adekuat të dispozitave të ligjit penal.
Madje sipas tij, që nga fillimi i këtij gjykimi procedurat nuk kanë qenë në rregull.
“Ky gjykim që nga fillimi ka nisur jo mirë dhe vështirë të pritet që të shkojë procedura krejt në rregull, ashtu siç duhet. Mbetet të shohim se si do të zhvillohet më tutje, por këtu ka shkelje dhe moszbatim adekuat të dispozitave të ligjit penal. Prej kësaj çka pamë dhe çka kanë nxjerrë në pah, më shumë se 80 për qind janë nga informatat operativë që pushteti serb i ka bërë”, deklaroi Vllasi në emisionin “Info Nata”.
I pyetur se a ka qenë e padrejtë mbajtja në paraburgim e tyre për dy vite e gjysmë, Vllasi vlerësoi që një periudhë kaq e gjatë e paraburgimit ishte e panevojshme.
“Krejt këto hetime deri te ngritja e aktakuzës, ka qenë e mundur të marrë shumë më pak kohë. Mirëpo, si duket e kanë shfrytëzuar mundësinë nga procedura e ligjit penal të Kosovës. Pasi që është ngritur aktakuza, kanë mundur që pas disa kohësh, ajo masë të zëvendësohet me arrestin shtëpiak”, u shpreh tutje Vllasi në Tëvë1./teve1.info/.
