Profesori universitar, Arben Fetoshi, vlerësoi që do të vazhdojë ende procedura juridike ndaj ish-krerëve të UÇK-së, në Gjykatën Speciale pavarësisht mbështetjes që ata kanë nga populli.
Madje sipas Fetoshit, të gjithë ata individë që po mbahen në Hagë janë duke e paguar në mënyrë të padrejtë tagrin e betejës së fundit në Kosovë.
“Është shumë i rëndësishëm aktivizimi i vazhdueshëm i Kosovës dhe Shqipërisë, kundrejt këtyre ngarkesave monstruoze, ndaj luftës së drejtë të UÇK-së. Përndryshe, procedura juridike do të vazhdojë, pavarësisht asaj që themi ne, pavarësisht numrit të qytetarëve që mblidhen në sheshet e Prishtinës, e pavarësisht nismave të tjera. Hashim Thaçi, Kadri Veseli, Jakup Krasniqi, Rexhep Selimi, Salih Mustafa, Pjetër Shala dhe dy ish-krerët e OVL-së, realisht janë duke paguar në mënyrë të padrejtë tagrin e betejës së fundit për Kosovën”, deklaroi Fetoshi në emisionin “Këndi i Debatit”në Tëvë1.
