Fadil Demaku, njëri prej deputetëve që votuan kundër formimit të Speciales, i pyetur nëse do të votohet rezoluta që shfuqizon rezolutën e Dick Martyt për themelim të Gjykatës Speciale, thotë se gjërat do të duhej të shkonin në atë drejtim.
“Logjika do të duhej të shkonte në atë drejtim sepse ajo rezolutë që është bërë, zhvillimet e mëvonshme kanë treguar se ata nuk kanë pasur fare të drejtë. Sepse s’ka pasë as çështje organesh e as “Shtëpi të Verdhë”. Krejt bota po e sheh aktakuzën që e shpalosi sot prokuroria. A pat diçka aty, nuk pat fare. Dhe unë menoj që do të duhet të shkojnë gjërat në atë drejtim”, ka thënë Demaku.
Tutje, ai ka shtuar se këtë Gjykatë do ta mbajnë sa do t’ju duhet.
“Besoj si individ thellësisht në pafajësinë e tyre. Si e shoh fundin e Gjykatës, nisna nga fillimi i Gjykatës. Fillimi i Gjykatës ka qenë politik, edhe fundin e shoh politik. Kjo Gjykatë ka qenë e krijuar jo si mekanizëm për drejtësi, po në shërbim të politikave të mëdha. Dhe sa do t’ju duhet, aq do ta mbajnë. Po flas në aspektin politik. Drejtësia nuk ka qenë qëllimi primar, se s’kanë çfarë drejtësie për me e bë këtu”, ka deklaruar ai në Ditari në Tëvë 1.
