Një ditë para se të fillojë gjykimi ndaj ish-krerëve të UÇK-së në Hagë, Gjykata Speciale ka dhënë detaje nga ajo se çfarë pritet të ndodhë nesër.
Përmes një komunikate thuhet se gjykimi do të fillojë me fjalën hyrëse të Zyrës së Prokurorit të Specializuar, për të vazhduar me deklaratat hyrëse të mbrojtjes.
Deklaratat hyrëse do të mbahen më 3, 4 dhe 5 prill.
“Duke filluar më 3 prill, Zyra e Prokurorit të Specializuar (ZPS) do të bëjë deklaratën hyrëse dhe për këtë qëllim i janë caktuar më së shumti 5 orë. Më tej, është planifikuar që mbrojtësi i viktimave do të bëjë deklaratën e tij hyrëse që do të zgjasë më së shumti 45 minuta. Pas mbrojtësit të viktimave, do të bëjnë deklarata hyrëse secili prej katër ekipeve të Mbrojtjes. Është planifikuar që këto deklarata të bëhen më 4 prill”, thuhet në komunikatë.
Tutje ceket se 140 persona janë pranuar si viktima pjesëmarrëse në proces gjyqësor.
“Personat të cilët demonstrojnë se kanë pësuar dëm fizik, mendor ose material si pasojë e drejtpërdrejtë e një krimi të paraqitur në Aktakuzën e Konfirmuar paraqesin kërkesë për të marrë pjesë në procesin gjyqësor në Dhomat e Specializuara. Këtu përfshihen persona që janë dëmtuar drejtpërsëdrejti dhe persona të cilët kanë pësuar dëm si pasojë e lidhjes së ngushtë me një viktimë të drejtpërdrejtë që pretendohet se është vrarë ose lënduar”, deklaron Specialja.
Trupi Gjykues ka bërë të ditur se paraqitja e provave në gjykim, duke përfshirë edhe thirrjen e dëshmitarëve nga ZPS-ja, do të fillojë më 11 prill 2023.
