Kryeministri i Kosovës, Albin Kurti, ka vizituar familjen e Kumnovës në 24-vjetorin e zhdukjes me forcë të Albion Kumnovës dhe pesë burrave të tjerë nga Gjakova.
Në këtë vizitë, kryeministri ka thënë se Qeveria e Kosovës është e përkushtuar për të zbardhur zhdukjet me dhunë gjatë luftës dhe për të mos rreshtur së kërkuari drejtësi për të gjitha krimet e luftës në Kosovë, raporton teve1.info.
“Kryeministri Kurti ritheksoi se Qeveria e Republikës së Kosovës është e përkushtuar për të zbardhur zhdukjet me dhunë gjatë luftës dhe për të mos rreshtur së kërkuari drejtësi për të gjitha krimet e luftës në Kosovë”, thuhet në njoftimin e Zyrës së Kryeministrit.
“Në dhomën e mbushur plot me kujtime të të birit ende të zhdukur, Nëna Nesrete kujtoi marsin e 1999, kur një javë pasi NATO filloi sulmet ajrore kundër Serbisë, Albioni, në atë kohë 21 vjeç, u mor nga shtëpia e tij, së bashku me pesë të afërm të tjerë civilë. Në prill 2011, eshtrat e personave që u morën bashkë me Albionin u gjetën në Batajnicë pranë Beogradit, dhe u rivarrosën në Gjakovë”, thuhet mes tjerash në njoftim.
Kurti gjatë kësaj vizite ishte i shoqëruar nga ministrja e Arsimit, Arbërie Nagavci dhe me kryetarin e Komisionit Qeveritar për Personat e Zhdukur, Andin Hoti, të cilët i mirëpriti udhëheqësja e shoqatës “Thirrjet e nënave”, Nesrete Kumnova. /teve1.info/
