Visar Shaqiri, bashkatdhetar që jeton në Londër, në një lidhje direkte nga atje tregon për organizimin e protestës që pritet të mbahen të hënën, me datë 3 prill në Hagë, ditë kjo kur ndaj ish-krerëve të UÇK-së do të nisë gjykimi.
Shaqiri, i cili është bashkorganizator i protestës në emisionin “Ditari” në Tëvë1, ka bërë të ditur se është organizuar transport falas nga Londra në drejtim të Hagës, në mënyrë që të jetë më e lehtë dhe numri më i madh i pjesëmarrësve në protestë.
“Numri dhe interesimi është shumë i madh, numër të saktë nuk mundem të them për momentin, por përafërsisht ne organizimin e kemi bërë për 5 autobusë. Ka edhe bashkatdhetarë të cilët kanë shprehur dëshirë që të vijnë me familjet e veta, me makina të veta, pra numri është i madh”, ka thënë Shaqiri.
Ai ka treguar se ka shqiptarë nga Kosova, Shqipëria, Maqedonia e prej shumë vendeve të tjera, të cilët janë të interesuar që të bashkëngjiten në protestë.
“Jemi në dijeni që ka organizim prej qyteteve të Gjermanisë, Amerikës, ka prej të gjitha anëve, sidomos prej Evropës, Itali, Zvicër, Belgjikë, Holandë, ka shumë të interesuar deri tash që kemi qenë në kontakt me organizator të qyteteve evropiane”, ka thënë ai.
Të hënën, më 3 prill do të nisë procesi i gjykimit ndaj ish-drejtuesve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit, në Dhomat e Specializuara të Kosovës me seli në Hagë.
