Asociacioni i Gazetarëve të Kosovës, i ka reaguar shefit të stafit të presidencës, Blerim Vela, i cili sot shkroi se raportimet e mediave për rrëzimin e mundshëm të presidentes nga Kushtetuesja, janë “përpjekje për ndikim të vendimmarrjes gjyqësore dhe tentim puç ndaj institucioneve legjitime të Republikës së Kosovës” dhe i konsideroi si pjesë e një “lufte speciale të realizuar sipas skemës së përgatitur nga Beogradi”.
AGK shkruan se ky është sulm ndaj mediave dhe se nuk është hera e parë që Vela i sulmon ato.
Po ashtu këtë gjuhë e konsideron të papranueshme dhe shumë të rrezikshme, e që rëndon ambientin e punës së gazetarëve në Kosovë.
Reagimi i plotë nga AGK
AGK: E rrezikshme dhe e papranueshme gjuha e Shefit të Stafit të Presidentes Osmani, Blerim Vela
Jo për herë të parë, Blerim Vela – Shef i Stafit të Presidentes së Kosovë, Vjosa Osmani, ka sulmuar mediet e Kosovës, pas raportimeve për një vendim të pritshëm të Gjykatës Kushtetuese për deputetë të minoriteteve në Kuvendin e Kosovës, që si zinxhir mund të vë në pikëpyetje zgjedhjen e Presidentes.
Vela në një postim skandaloz në Twitter, thotë se raportimet e medieve të Kosovës “janë pjesë e luftës speciale të realizuar sipas skemës së përgatitur nga Beogradi dhe të realizuar përmes kriminelëve të veriut dhe sekserëve të tyre, të cilët ndodhën në listën e zezë të SHBA-së”.
Kjo është një gjuhë e papranueshme dhe shumë e rrezikshme që rëndon ambientin e punës së gazetarëve në Kosovë. Për më tepër është vazhdimësi e sulmeve të zotit Vela ndaj medieve.
Teksa merr pjesë në Samitin e Demokracisë, AGK-ja i bën thirrje të përsëritur presidentes Vjosa Osmani që përfundimisht të ndalojë sulmet ndaj medieve nga kabineti i saj, e që shërbejnë si presion direkt në punën e tyre.
https://teve1.info/lajmet/vela-lajmet-se-kushtetuesja-do-ta-rrezoje-presidenten-tentim-puc-ndaj-institucioneve/
