Tepihu i kuq u shtrua për të. Kjo sepse është vizita e tij e parë në qytetin e Preshevës.
Ambasadori amerikan në Beograd, Christopher Hill, gjatë ditës së martë u prit në takim nga Kryetari i Preshevës, Shqiprim Arifi.
Hill, po i dëgjonte nga afër shqetësimet që i kanë shqiptarët në Luginën e Preshevës.
Ai tha se do të shoh se në çfarë formë mund të jetë i dobishëm për këtë çështje.
“Ne kemi pasur një diskutim konstruktiv dhe kryetari më ka njoftuar në detaje rreth problemeve të qytetarëve në Preshevë. Do të kthehem në Beograd dhe më leni të mendoj dhe të shoh se si mund të jem i dobishëm por mendoj se është shumë e rëndësishme që njerëzit ta kenë të qartë në atë se çfarë thonë dhe çfarë kërkojnë”, tha Hill.
Hill foli edhe për dialogun mes Kosovës dhe Serbisë, ku pret që të dyja palët të fillojnë me zbatimin e marrëveshjeve.
“Të jemi të qartë se procesi i dialogut nuk është aspak i lehtë për presidentin Vuçiq dhe kryeministrin Kurti. Ajo çka mund të them është se ka pasur një progres të mirë në takimin e fundit me palëve. Për mua ndër elementet kryesore është që Prishtina duhet të adresojë Asociacionin e komunave me shumicë serbe dhe sigurisht edhe çështjet e tjera që është pajtuar të bëjë e që mund të përmirësojnë raportet me Bashkimin Evropian. E njëjta gjë vlen edhe për Serbinë, duhet t’i respektoj marrëveshjet e arritura me Kosovën”, shtoi ai.
I gatshëm për të kontribuar në procesin e dialogut u shpreh edhe Kryetari i Preshevës, Shqiprim Arifi.
Mes tjerash, Hill u pyet edhe për raportet e fundit ndërkombëtare që tregojnë se demokracia ne Serbi po përkeqësohet.
“Serbia i ka këto sfida, siç i kanë edhe shtetet e tjera, madje me disa nga këto probleme ballafaqohet edhe shteti im. Por unë jam optimist se këto çështje do të adresohen dhe situata do të ndryshoj. Qytetarët serb, e kanë bërë të qartë se drejtimi që ata dëshirojnë ta ndjekin është Brukseli”, deklaroi Hill.
Vizita e tij vjen dhjetë ditë pas dakordimit të Kosovës e Serbisë për marrëveshjen për normalizim e raporteve mes dyja vendeve.
Kronika e gazetarit Shpat Blakçori.
