Qendra tregtare në Pejë dhe kompania “Elkos” janë kapluar nga zjarri mëngjesin e së shtunës, raporton teve1.info
Zëdhënësi i Policisë për Rajonin e Pejës, Fadil Gashi, tha për teve1 se fillimisht nga zjarri është përfshirë kompania “Elkos” derisa prej saj është shpërndarë zjarri edhe në qendër tregtare.
Gashi tha se nuk ka informata për lëndime në njerëz ndërsa shtoi se policia, zjarrfikësit dhe eksperti i zjarreve po qëndrojnë në vendin e ngjarjes për të zbardhur rastin.
“Sot në orët e hershme të mëngjesit, në orën 8:50 ka ndodhur një zjarr, policia ka dalë në vendin e ngjarjes atje. Fillimisht zjarri ka kapluar objektet e Elkosit ma vonë si duket zjarri ka kalu edhe në qendër tregtare. Nuk dihet më shumë, nuk ka informata. Nuk ka informata për të lënduar në njerëz”, tha Gashi.
Zëdhënësi Gashi tha se nuk ka të dyshuar për zjarrvënie dhe se këto detaje do të publikohen pas ekspertizës në vendin e ngjarjes.
“Është shumë herët për të dyshuar për zjarrvënie apo si ka ndodhur zjarri. Policia, zjarrfikësit e të gjitha qendrave të Pejës janë në vendngjarje edhe eksperti i zjarreve por tani janë këto procedurat e hetimit”, tha Gashi.
