Zëdhënësi i Partisë Demokratike të Kosovës, Faton Abdullahu, tha se qytetarët e Kosovës do t’i marrin vizat pasi sipas tij Kurti po i bënë lëshimet për Asociacionin, raporton teve1.info
Përmes një statusi në Facebook, Abdullahu ka thënë se po të bëheshin këto lëshime dje, qytetarët e Kosovës do t’i kishin vizat.
Sipas Abdullahut, për shkak të kundërshtimit të Asociacionit deri më tani, pavarësisht se Kosova i ka plotësuar kriteret e BE-së tash e tri vite, liberalizimi nuk ka ndodhur.
“Vizat për kohë të gjatë kanë qenë tundim politik për Kosovën. Mungesa e tyre është diskriminim socio-politik (deri në racizëm) që ka bërë Brukseli kundër qytetarëve të Kosovës. Tash disa vite Kosova i ka përmbushur kushtet e BE-së për vizat. Përkundër kësaj vizat nuk na janë dhënë. Arsyeja kryesore ka qenë se BE në ofertën e saj politike ‘shkopi dhe karota’ vizat i ka trajtuar karotë speciale. Vizat BE për Kosovën i ka kthyer në ‘xhoker politik’ – të përshtatshme për gjithkënd, për çdo gjë. Po të bëheshin dje lëshimet që sot po i bën Kurti për Asociacionin ne do t’i kishim vizat. Por ato lëshime dje nuk janë bë. Edhe kur janë bë Gjykata Kushtetuese i ka përmirësu. Ndërsa Kurti po i bën lëshimet sot prandaj do t’i marrim vizat”, ka shkruar Abdullahu.
