Zëvendëskryetari i Komisionit Parlamentar për Siguri, Enver Dugolli i ftuar në emisionin “ Ditari” në Tëvë1 , tha se aksioni i sotëm i arrestimeve të zyrtarëve policorë nuk guxon ta njollosë punën e çmueshme të burrave e grave me uniforma “blu”.
“Arrestimi është shenjë e funksionimit të institucioneve të pavarura pa interferim dhe pa pengesë. Kjo nënkupton që institucionet e Kosovës nuk ndërhynë në prokurori e inspektorat”, tha Dugolli
Ai tha se ky rast është hetuar një kohë të gjatë ku disa zyrtarë kanë keqpërdorur detyrën e tyre dhe se është për t’u përshëndetur vendosmëria e policisë për ta luftuar krimin.
“Ne inkurajojmë prokurorinë dhe inspektoratin që të kryen detyrat e tyre të zbatojnë ligjin dhe të mos bëjnë pakt me krimin dhe korrupsionin. Kjo është vendosmëri që të luftohet krimi dhe korrupsioni sepse para ligjit të gjithë duhet të jemi të barabartë”, tha Dugolli
Sipas tij, mund të priten ende aksione të tilla.
