Analistën në studion e Këndit të Debatit në Tëvë 1 kanë debatuar për mundësitë që marrëveshjet e fundit me Serbinë të mos zbatohen nga kjo e fundit.
Analisti Dorajet Imeri ka thënë se Serbia nuk do të pranojë asnjë model për Asociacionin që do t’ia ofrojë Kosova.
“Kam pasë shumë ma shumë shpresë kur e kam parë marrëveshjen , ndërkaq kur e kam pa aneksin e zbatimit të saj më duket që jam zbeh pak në mundësinë për realizimin e saj”.
“Mënyra e ndërtimit të saj dhe vendosja e kushtit të parë që Kosova të filloj zbatimin e marrëveshjes me krijimin e asaj që është vetmenaxhim a vetqeverise, sido që ta quani, tregon që Serbia nuk do të pajtohet me asnjë format që Kosova do t’i ofroj asaj në ditët në vijim. Pra jam mëse i bindur për këtë. Kosova me gjasë as pas 30 ditëve apo kur është afati i parë, kur të paraqes ndonjë nga opsionet, jam i bindur se Serbia do ta dështojë si projekt, nuk do ta pranoj si të tillë”, ka deklaruar Imeri.
Analisti Dritëro Arifi iu ka përgjigjur se sa i përket nenit 7, Kosova ka punë vetëm me BE-në.
“Pika e 7 që do ta zbatojë Kosova nuk ka lidhje me Serbinë më. Është e specifikume, vetëm me BE-në kemi punë dhe me komunitetin serb në Kosovë”, deklaroi Arifi.
Atij i reagoi Imeri duke thënë se disa marrëveshje në të kaluarën i ka dështuar vet Serbia.
“Ne kemi pas marrëveshje edhe për targa, edhe atë të energjisë. Nuk besoj që mund të ketë zgjidhje për momentin”, ka thënë ai.
Kurse Arifi prapë i ka replikuar duke i thënë se tani i takon Kosovës t’i kryejë detyrat e veta.
“Ne duhet me i kry detyrat tona. Nëse e presim ne Serbinë, ajo i konvenon pikërisht kjo që po e thua ti, pra status quo’ja”.
Ndërsa analistja Arta Tahiri-Beqa ka thënë se këtë herë do të ketë ndëshkime për Serbinë nëse thyen rregullat.
“Është një përcaktues tjetër i jashtëm, këtu nuk janë vetëm Kosova dhe Serbia. Nuk ka njeri që pret që Serbia të jetë palë favorizuese apo mbështetëse lidhur me Kosovën. Dorajeti thotë që Serbia s’ka për ta pranu, është fakt por nëse dikush thyen rregullat ka ndëshkime”, ka deklaruar ajo.
