Marrëveshja e arritur mes Kosovës dhe Serbisë në Ohër është ligjërisht e detyrueshme edhe pa nënshkrim, ka thënë ambasadori i Shteteve të Bashkuara të Amerikës (SHBA) në Beograd, Christopher Hill.
Ai ka shtuar se një nga elementët kyçe të marrëveshjes është se detyrimet e të dyja palëve janë pjesë e procesit të integrimit evropian.
Hill theksoi se është bërë e qartë se formimi i Asociacionit të Komunave me Shumicë Serbe është urgjent dhe i rëndësishëm, duke kujtuar se ky është një obligim që është pranuar para 10 vitesh nga Kosova, Serbia dhe BE-ja, transmeton teve1.info.
“Nga këndvështrimi i publikut serb, është shumë e rëndësishme që organizatat ndërkombëtare, si BE-ja, të kenë një marrëveshje të cilës [v.j palët] duhet t’i përmbahen dhe të sigurojnë zbatimin e saj”, tha Hill.
“Unë kam qenë i përfshirë në shumë negociata ku nuk ka pasur asnjë nënshkrim në fund të procesit. E di që ka shumë diskutime për këtë, por nuk mendoj se ka shumë rëndësi. Pyetja e vërtetë është a do të vazhdohet me zbatimin dhe kjo do të jetë interesante të shihet në javët dhe muajt e ardhshëm”, parashikoi Hill.
I pyetur për deklaratën e presidentit serb Aleksandër Vuçiq se do të zbatojë aneksin e propozimit evropian deri në vija të kuqe, Hill u përgjigj se Vuçiq e ka thënë qartë se çfarë mund të pranojë dhe çfarë jo.
“Në vend që të flasim për vijat e kuqe, duhet të fokusohemi në faktin se ai e kishte shumë të qartë me BE-në se çfarë mund të bënte, si dhe kur, gjë që mendoj se është mirë. Mendoj se duhet bërë edhe nga ana e Kosovës”, tha Hill për FONET.