Mungesa e masave mbrojtëse shihet si faktor kryesor që gjashtë punëtorë ndërtimtarie kanë humbur jetën në vendin e punës vetëm gjatë këtij viti.
“Kjo shifër është jashtëzakonisht e ranë dhe po e themi definitivisht nuk jemi duke shkuar nga përmirësimi, por jemi duke shkuar nga rruga e regresit”, u shpreh Jusuf Azemi, kryetar i Sindikatës së Pavarur të Sektorit Privat.
Por edhe më e rëndë, sipas Azemit është zvarritje e lëndëve në Gjykatë në rastet e tilla.
“Në shumë vende kemi stagnim të procesit, kemi në shumë raste ndryshim të raporteve zyrtare të rasteve se si kanë ndodhë dhe kjo me të vërtetë është e ranë, por jo më larg se sot pata familjarë që vinin edhe qanin për shkak se procedurat nuk po shkojnë ashtu siç duhet të shkojnë”, shtoi Azemi.
E procesi, sipas tij, po zgjatë deri në gjashtë vjet.
Por sipas Shoqatës së Ndërtuesve të Kosovës, gjendja megjithatë është më e mirë se më parë.
“Në vendin tonë, nëse e marrim nga numri i aksidenteve dhe sasia e ndërtimeve që është tani, kushtet janë shumë më mirë se vitet më parë. Kemi qasje në pajisje mbrojtëse, por lë për të dëshiruar përdorimi i tyre prej punëtorëve”, deklaroi Faton Hoxha nga Shoqata e Ndërtuesve të Kosovës.
Tëvë1 ka tentuar gjatë ditës të marr informacione nga Inspektorati i Punës lidhur me dënimet të cilat u janë shqiptuar kompanive të ndërtimit për mosplotësim të kushteve të punëtorëve, mirëpo nga ky institucion nuk kanë kthyer përgjigje.
Kronika e gazetares Albiona Hajdari.
