Tashmë është mbyllur afatit për njoftim të partive politike se nuk duan të marrin pjesë në zgjedhjet e 23 prillit në katër komunat veriore, ndërsa Lista Serbe nuk ka njoftuar zyrtarisht se nuk do të marrë pjesë në këto zgjedhje.
Zëdhënësi i KQZ-së, Valmir Elezi ka thënë se janë 11 subjekte politike që zyrtarisht kanë deklaruar se nuk do të marrin pjesë në këto zgjedhje.
Megjithatë ai nuk ka përmendur Listën Serbe.
“Partitë politike që kanë deklaruar mospjesëmarrjen në këtë process zgjedhor janë: Partia Demokratike e Diasporës, Inicative e Re Demokratike e Kosovës, Pokret za Gora, Fjala, Socialdemokratsa Unija, Partia e Ashkalinjve për Integrim, Kosovaksi “Nevi Romani Partia”, Partia Demokratike e Unitetit, Kosova Demokratik Turk Partisi, Partia Balliste dhe Jedinstvena Goranska Partija. Pra këto janë 11 partitë politike që kanë deklaruar vullnetarisht që nuk do të marrin pjesë në proces zgjedhor”, ka thënë Elezi.
Ai ka thënë se ky lloj njoftimi është i zakonshëm pas hapjes së një procesi zgjedhor teksa ka shtuar se ka parti që pavarësisht se nuk njoftojnë zyrtarisht, nuk marrin pjesë në zgjedhje.
“Është rregull zgjedhore e KQZ-së që partitë politike që janë të regjistruara në Kosovë që pasi që të hapet data e zgjedhjeve e një procesi zgjedhor, kanë një afat të caktuar kur njoftojnë KQZ-në se nuk duan të marrin pjesë në procesin zgjedhor”.
“Nganjëherë jo të gjitha partitë që nuk marrin pjesë në proces zgjedhor nuk e njoftojnë KQZ-në, ndonjëherë nuk marrin pjesë në zgjedhje por nuk e njoftojnë KQZ-në”, deklaroi ai në emisionin Ditari në Tëvë 1.