Përgatitjet për takimin e radhës Kurti – Vuciq në kuadër të dialogut Kosovë – Serbi, tani më kanë filluar.
Emisari i Bashkimit Evropian Miroslav Lajcak, pas takimit me kryeministrin e Kosovës tha se pritshmëritë e tij janë përmbushur. Në anën tjetër vet kryeministri Albin Kurti tha se pret që më 18 mars në Ohër do të nënshkruhet një marrëveshje.
Këtë qasje të qeverisë së Kosovës, njohësi i çështjeve politike Emir Abrashi e cilëson si konstruktive dhe thotë se si e tillë duhet të vazhdojë.
“Kjo pa dyshim tregon që pala kosovare është konstruktive në procesin e dialogut gjë për të cilën kanë bërë thirrje tash e sa kohë që ne t’i shmangemi në çfarëdo forme dukjes si palë jokonstruktive. Në këtë aspekt e aplaudoi qeverinë që ka arritur të shpërfaq konstruktivitet në raport me ndërmjetësuesin, me palën e Bashkimit Evropian. Dhe nga takimi i 18 marsit sa do që do të doja që të arrihet një marrëveshje përfundimtare dhe sado që pala kosovare është e gatshme nevojitet që të dyja palët të jenë në të njëjtën linjë, pra edhe pala serbe të jetë e gatshme për të nënshkruar marrëveshjen dhe nuk do të çuditesha edhe nëse kjo nuk arrin të nënshkruhet edhe me 18 mars. Ajo që është e rëndësishme është pala kosovare të vazhdoj të jetë konstruktive dhe nëse pala serbe do të jetë bllokuese e nënshkrimit me 18 mars atëherë padyshim që aleatët ndërkombëtarë të Kosovës, BE dhe SHBA do ta rrisin presionin karshi Beogradit dhe kjo është ajo që Kosovës i konvenon”, vlerësoi Abrashi.
Në anën tjetër presidenti i Serbisë, Aleksandar Vuciq ka një qëndrim më pengues për dialogun. Ai së fundmi ka deklaruar se nuk do ta njeh pavarësinë e Kosovës, e as anëtarësimin e saj në OKB. Para mediave në Serbi ka thënë se nuk do ta nënshkruaj kapitullimin e Serbisë.
Njohësi i çështjeve politike, Xhelal Neziri thotë se Vuçiq më shumë po e përdorë këtë qasje për pazare politike, se sa që i frikësohet opinionit të brendshëm në Serbi.
“Mendoj se çështja kyçe e hamendësimit të Vuciqit nuk është në raport me opozitën brenda Serbisë, por është në fakt një çështje që ai dëshiron ta negocioni me Bashkimin Evropian, pra çfarë fitoi ai nëse nënshkruan një marrëveshje ku defakto e pranon Kosovën. Ose një marrëveshje që do të thotë fillim i një procesi pak më të gjatë që do të nënkuptonte normalizim të marrëdhënieve deri në pranim të ndërsjellë. Është çështje pazari do të thoja se sa çështje të ndonjë frike nga ndonjë opozitë e brendshme”, tha Neziri.
Bashkësia Ndërkombëtare i ka njoftuar palët me sanksionet që do të përballen, në raste se e refuzojnë marrëveshjen e normalizimit.
Kronika e gazetarit Valmir Gallopeni.
