Kryetari i PDK-së, Memli Krasniqi ka pritur në takim ambasadorin e Francës në Kosovë, Olivier Guerot, me të cilin ka biseduar rreth situatës aktuale politike në vend dhe zhvillimeve për dialogun.
Krasniqi ka thënë se ambasadorit Guerot se në marrëveshje mungon njohja e ndërsjellë si rezultat përfundimtar i procesit të dialogut mes Kosovës dhe Serbisë.
“Pata kënaqësinë të pres në takim ambasadorin e Francës në Kosovë, Olivier Guerot, me të cilin diskutuam rreth situatës aktuale politike në vend dhe zhvillimeve në dialogun mes Kosovës dhe Serbisë. Ambasadorit Guerot, i shpreha qëndrimet e Partisë Demokratike të Kosovës rreth këtij procesi dhe rezervat që i kemi shfaqur edhe publikisht lidhur me marrëveshjen aktuale të prezantuar, duke u fokusuar posaçërisht në mungesën e njohjes së ndërsjellë si rezultat përfundimtar i procesit të dialogut ndërmjet Kosovës dhe Serbisë”, ka shkruar ai në një postim në Facebook.
Sipas tij, PDK mbetet e përkushtuar për bashkëpunim me aleatët ndërkombëtarë.
“PDK mbetet e përkushtuar për bashkëpunim të vazhdueshëm dhe koordinim konstruktiv me aleatët tanë ndërkombëtarë, gjithmonë në funksion të arritjes së qëllimeve tona shtetërore”, përfundoi Krasniqi. /Teve1.info/
