Dy partitë opozitare PDK e LDK kanë lëshuar sallën e Kuvendit, si shenjë revolte e mungesës së deputetëve të shumicës për të kaluar pikat e rendit të ditës, raporton teve1.info.
Gjatë pritjes së realizimit të seancës, shefi i Grupit Parlamentar të Partisë Demokratike të Kosovës, Abelard Tahiri, ka thënë se kjo parti e lëshon sallën pasi që 1 orë e gjysmë kanë pritur dhe nuk ka kaluar asnjë pikë.
“Ne që 1 orë e gjysmë jemi këtu dhe nuk po mundemi me kalu as edhe një pikë të vetme, na keni vendosur përpara një lloj kaosi parlamentar dhe tash kemi seanca të pambyllura prej vitit të kaluar. Kjo është e papranueshme dhe unë mendoj që si Grup Parlamentar dhe me partitë tjera të opozitës nuk do të vazhdojmë të qëndrojmë në seancë, sepse është e pakuptimtë qëndrimi jonë në këtë seancë. U munduam të ju dhurojmë përkrahje në marrëveshje ndërkombëtare, prapë ju nuk i keni 61 deputetë prandaj ne si Grup Parlamentar nuk do të vazhdojmë më tuje të qëndrojmë në këtë seancë”, tha Tahiri duke u përgatitur ta lëshojë sallën.
Njëjtë ka vepruar edhe Lidhja Demokratike e Kosovës, shefi i Grupi Parlamentar, Arben Gashi, tha se partia e pozitës po sillet e papërgjegjshme.
“Në vazhdën e sjelljes së papërgjegjshme të Grupit Parlamentar të LVV-së lidhur me marrëveshjet ndërkombëtare duke i postuar nga rendi i ditës e bënën punën e pamundur në Kuvend, kështu që edhe ne se si Grup Parlamentar nuk do të vazhdojmë këtë seancë”, tha Gashi.
