Qeveria e Kosovës, gjatë mbledhjes së sotme ka miratuar Projektligjin për ndryshimin dhe plotësimin e Ligjit Nr.04/L-054 për Statusin dhe të Drejtat e Dëshmorëve, Invalidëve, Veteranëve, Pjesëtarëve të Ushtrisë Çlirimtare të Kosovës, Personat e dhunuar gjatë luftës, Viktimave Civile dhe Familjarëve të tyre, i ndryshuar dhe plotësuar me Ligjin Nr.04/L-172.
Për këtë Projektligj, kryeministri i Kosovës, Albin Kurti, ka thënë se vazhdon procesi i aplikimit për njohjen e statusit të mbijetuarve të dhunës seksuale gjatë luftës së fundit në Kosovë, raporton teve1.info.
“Me këtë Projektligj ne vazhdojmë procesin e aplikimit për njohjen e statusit të mbijetuarve, të mbijetuarave të dhunës seksuale gjatë luftës nga këtu ju bëj thirrje të mbijetuarve që të aplikojnë dhe ta realizojnë të drejtën e tyre të garantuar me ligj në një proces i cili është konfidencial. Të mbijetuarit e dhunës seksuale gra e burra, kanë nevojë për drejtësi kanë nevojë edhe për përkrahjen tonë shoqërore për të luftuar stigmen me të cilën ende përballemi”, tha kryeministri Kurti gjatë mbledhjes së Qeverisë.
Ndërkohë, ministri i Financave, Hekuran Murati, ka bërë të ditur se afati për aplikimin e njohjes së statusit për personat që kanë përjetuar dhunë seksuale është shtyrë edhe për dy vite të tjera, përkatësisht me datë 15 maj 2025.
“Të gjithë personat të cilët kanë përjetuar dhunë seksuale gjatë luftës kanë pasur mundësinë që të parashtrojnë kërkesë për njohjen e statusit të viktimës së dhunës seksuale gjatë luftës deri më datë 05 shkurt të këtij viti dhe me njohjen e statusit mundësohet edhe e drejta në mbështetje dhe beneficione tjera të përcaktuar në këtë ligj. Duke konsideruar ndjeshmërinë dhe komplicitetin e trajtimit të rasteve të dhunës seksuale dhe njëkohësisht faktorët shoqërorë të cilët mund të ndikojnë në raste të tilla që hezitojnë të lajmërohen në organet kompetente e po ashtu marrë parasysh edhe faktin e vështirësive të krijuara gjatë pandemisë kur është pamundësuar lëvizja e lirë, e kemi vlerësuar që është e domosdoshme që ky afat të shtyhet edhe për dy vite të tjera. Pra, aplikimi për njohjen e statusit për gjithë personat që kanë përjetuar dhunë seksuale gjatë luftës të vazhdohet edhe për dy vite të tjera, konkretisht deri më datë 15 maj të vitit 2025”.
Anëtari i sekretarisë së komisionit, Labinot Bala, më parë ka treguar se që nga fillimi i procesit të njohjes së statusit komisioni ka pranuar gjithsej 1935 aplikacione. Ndërkaq, drejtoresha e QKRMT-së, Feride Rushiti ka thënë se kanë dorëzuar rekomandimet e tyre, me kërkesën që afati për aplikim të mos kufizohet në dy vitet e ardhshme, meqë krimet e luftës nuk parashkruhen.
