Pas ngritjes së çmimeve shporta e qytetarit është dëmtuar shumë, ka thënë Anëtari i kryesisë së Bashkimit të Sindikatave të Pavarura të Kosovës (BSPK), Rashit Mehmeti, njëherësh dhe anëtar i Këshillit Ekonomiko-Social.
“Në radhë të parë ne nuk jemi kundër Qeverisë. Mirëpo sindikata shikon gjithmonë anën e punëtorit, e shikon shportën e punëtorit, shportën e qytetarit gjithmonë. Unë mendoj që shporta e qytetarit tash për tash është dëmtuar mjaft shumë me këto ngritje të cilat janë bërë. Paga minimale 264 euro, po them kështu në 2017 Këshilli i Ekonomiko-Social, po flas si anëtar i këtij këshilli ne e kemi aprovuar dhe jemi marr vesh me Odat ekonomike që të jetë 250 euro. Mirëpo ajo nuk u realizua asnjëherë që nga atëherë”, ka thënë ai.
Ai ka shtuar se në bazë të disa kalkulimeve që janë bërë, paga minimale duhet të jetë jo më e vogël se 400 euro.
“Ne i kemi nxjerrë disa statistika këtu shportën e konsumatorit e cila nuk përfshin as rrymë, as ujë e as mbeturina po vetëm jetën kështu që del diku rreth 400 e diçka euro. Prandaj ne konsiderojmë që është tepër e vogël 264 euro siç e kanë nxjerr në bazë të statistikave”, u shpreh ai.
Sipas Mehmetit, shteti i Kosovës, e ka pagën minimale më të ulëtën në rajon.
“Mirëpo populli nuk do të jetë i kënaqur, punëtoria nuk do të jetë e kënaqur me të sepse për shembull kemi marr edhe disa statistika të vendeve përreth. Serbia 297 euro, Bosnja dhe Hercegovina 277, Shqipëria e ka 248, Maqedonia 363 euro, kurse Kosova e ka 170 euro. 170 euro do të thotë ne jemi larg edhe me vendet përreth që i kemi të cekura tash për tash këtu. Këto shënime i ka edhe Qeveria. Po veprime sindikale janë paralajmëruar. Tash me datën 12 SBAShK-u ka paralajmëruar protesta për ligjin e punës. Besoj shumë, unë nuk jam ithtar i atyre protestave fare me të thënë të drejtën po jam me gjet bashkëpunimin në proporcion me buxhetin e shtetit”.
Këtë e ka mbështetur edhe Kryetari i Sindikatës së Sektorit Privat, Jusuf Azemi, duke thënë se paga minimale nuk duhet të jetë nën 400 euro.
“Ne nuk e kemi marrë me shqetësim propozimin e Qeverisë së Kosovës, pasi që ne kemi propozimin tonë, përpos propozimit kemi edhe vendimin tonë se SPSK-ja nuk pranon dhe nuk do të pranojë edhe në të ardhmen pagë minimale nën 400 euro pasi që ne me këtë pagë që kemi kërkuar nuk është që do të kërkojmë që të bëjmë një jetë luksoze por është diçka minimale pa të cilën nuk mund të kalohet”, ka thënë ai.
