Kryetari i Këshillit për mbrojtjen e të drejtave të veteranëve, Xhevdet Qeriqi ka rrëfyer përjetimet e tij gjatës luftës në Kosovë. Ai bëri të ditur se kishte qenë beteja e familjes së Jasharëve, që e ka shtyer t’i bashkohet radhëve të UÇK-së.
Qeriqi bëri të ditur se ai ka shërbyer në pjesën e grykës së Carralevës, teksa përballjen e parë me forcat serbe e kishte pasur në korrik të 98-ës.
“Përballjen e parë e kom pasë në korrikun e vitit ‘98, ka qenë ishin disa përpjekje të forcave serbe për të kaluar në për grykën e Carralevës, por ishte terren i papërshtatshëm dhe kështu që hasnin në rezistencë të UÇK-së, e kishin të pamundur të kalonin edhe e kishin zgjedh një alternativë tjetër, që përmes një fshati Zborc, të kalojnë në pikën e lartë, kështu që të arrijnë të depërtojnë përmes asaj ane. Dhe kështu që, unë isha nëse nuk harroj, nuk jam i saktë me data 24 a 25 korrik të ‘98, isha në ndërrimin e natës, sepse kemi qenë një grup në ndërrimin e natës, dhe atëherë filluan në orët e hershme të mëngjesit filluan ato granatimet e mëdha, se armiku fillimisht fillonte me granatime, pastaj provonte që të ec përpara”, deklaroi ai në “Herët” në Tëvë 1.
Ai dha detaje edhe për plagosjen që kishte marrë gjatë luftës dhe pasojat të cilat i vuan sot e asaj dite.
“Unë kam qenë i plagosur nga pushka automatike, e kam këtë pjesën e bërrylit deri këtu nalt (krahu), e kam të palëvizshme sot e asaj dite, nuk lëviz ka mbetur në këtë formë që është. E kam pasur komplet këtë pjesën e bërrylit të humbur, edhe kështu që kanë pasur të pamundur të intervenojnë që ta shtijnë në funksion për lëvizje. E tash sot e asaj dite e kam në këtë formë. Shfaqen infeksione, në atë kohë më patën vendosur disa metale brenda dhe jashtë sepse ishte kocka një pjesë diku rreth 4-5 cm komplet e humbur. Mu ka dasht me qëndru bukur gjatë i shtrirë në spitalin ushtarak në Tiranë…operacioni i parë ka zgjat diku rreth 5-6 orë, operacioni i dytë rreh 1 e orë e gjysmë, probleme kam pas dhe vazhdoj të kem edhe sot”, potencoi Qeriqi.
Tutje ai tregoi se shkak i plagosjes ka pasur dhjetëra intervenime, pasi çdo vit ka infeksione. /Teve1.info/