Gazetarja që ka raportuar gjatë luftës së fundit në Kosovë, Donika Shahini-Lami, ka treguar për sfidat në të cilat ka kaluar derisa ka arritur në shtëpitë e Jasharëve me datë 10 mars 1998, pas masakrës që e kishin bërë forcat serbe ndaj familjes Jashari.
Derisa gazetarja ishte me ekip tregon për ballafaqimin me paralimitarët serbë, të cilët kanë shkaktuar probleme derisa ata kanë arritur të marrin xhirime nga vendngjarja.
“Rruga ishte e bllokuar nga Komorani, shkuam për Mitrovicë, kaluam rrugën e Mitrovicës, Pestovë, Klinë dhe Skenderaj. Ballafaqimi me forcat serbe ishte emocion shkatërrues, kujtoj që kanë qenë diku 5, 6 postblloqe të paralimitarëve dhe ushtarëve serbë. Gazetarët kishin kërkuar që unë mos të dilja nga vetura edhe pse ishim të akredituar me akreditim ndërkombëtarë, mirëpo me gjithat përpara neve ishin kriminelët që kishin vrarë fëmijë nga 7 deri në 77. Kujtoj që na kanë ndaluar në tre postblloqe, fytyra më të prishura nuk kam parë kurrë në jetën time, kundërmonin alkool, ishin krejtësisht me një personalitet të çrregullt, bisha”, ka thënë ish-gazetarja Donika Shahini-Lami në emisionin “Ditari” në Tëvë1.
Ajo ka treguar se do të vinte një moment kur përmes xhirimeve të saj bota do ta kuptonte të vërtetën, ku nuk bëhej fjalë për terrorizëm, por për një luftë kundër popullit shqiptar që kërkonte liri.
“Më shumë ndjeja dhimbje sesa frikë, më shumë e kisha ndjenjën e pamundësisë për të ju kundërvënë, pamundësinë për të reaguar, pamundësisë për të ju thënë atë që mendoja, mirëpo e dija që do të vinte momenti im, sepse në storie që neve raportonim dhe në storjet në të cilat informonim më vonë botën demokratike ishin ato mendime të cilat i mbaj edhe sot, ishte e vërteta që është e vërteta e shqiptarëve, e vërteta e anës së drejtë se aty nuk kishte të bënte luftë kundër terrorizmit ishte një luftë kundër një populli që po kërkonte lirinë”, tha ajo.
Shahini-Lami në atë kohë ishte 19-vjeçare, kishte bërë marrëveshje me televizionin publik të Japonisë që si koordinatore të raportonte për ngjarjet në Kosovë.
