Pas ekzekutimit të pagave në sektorin publik me koeficient të ri, pati kritika edhe nga Kryetari i Grupit Parlamentar të AAK-së, Besnik Tahiri.
Tahiri përmes një postimi në Facebook, ka shkruar se me shpërndarjen e këtyre pagave, janë mashtruar punëtorët.
Derisa ka shtuar se pas kësaj agjende politike, qëndron Qeveria Kurti, raporton teve1.info.
“Sot amatorët vendimmarrës dhe një kontigjent i vogël jo profesionistësh, ekzekutuan të ashtuquajturat Paga. Sot, shumica dërrmuese e profesionistëve në administratën publike, mbi 80 mijë u fyen, u tallën, u mashtruan. Ata në vend të pagave, pranuan transfere kuturu. Disave nuk u janë llogaritur shtesat, të tjerëve përvoja, rrezikshmëria, të tjerëve kompensimet tjera, e kështu me radhë. Prapa kësaj qëndron agjenda politike e kësaj qeverie, pranoni pagat ose lëreni punën”, ka shkruar Tahiri në Facebook.
Derisa në përmbyllje të tekstit, Tahiri ka shkruar se Qeveria Kurti nuk qeveris përmes ligjeve, pasi sipas tij, ligjeve iu referohen vetëm për të shtyrë përpara turpin.
Derisa sot pasdite, kryetari i SBASHK-ut, Rrahman Jashari, ka konfirmuar se janë ekzekutuar pagat e muajt shkurt për punonjësit në sektorin publikë, përfshirë këtu edhe për mësimdhënësit, për herë të parë sipas koeficientit të ri të pagave bazuar në ligjin e ri./teve1.info/.