Deputeti i Alenacës për Ardhmërinë e Kosovës, Pal Lekaj, duke folur për takimin e 27 shkurtit në Bruksel mes kryeministrit kosovar, Albin Kurti dhe presidentit serb, Aleksandar Vuçiq, vlerësoi se nuk është arritur maksimumi i më të mirës për shkak të Kurtit.
Madje sipas tij, Kurti tashmë e ka ulur shumë nivelin e dialogut me Serbinë.
“Sa i përket takimit të djeshëm, lë për të dëshiruar, sepse nuk ka firmosje as nga Vuçiq as nga Kurti. Ne si Aleancë për Ardhmërinë e Kosovës kemi deklaruar që e mbështesim marrëveshjen, sepse është një marrëveshje që është pritur me vite të tëra. Por, me veprimet e Kurtit kemi ardhur në një situatë të tillë, saqë edhe kjo marrëveshje na duhet si diçka e mrekullueshme. Kurti e ka ulur shumë nivelin e dialogut dhe përgjegjësinë ndaj asaj që e ka thënë. Nuk është arritur maksimumi i më të mirës për shkak të Kurtit”, deklaroi Lekaj në emisionin “Ditari”.
Derisa shtoi se AAK e ka përkrahur këtë proces, mirëpo sipas tij, kryeministri Kurti nuk është falënderues.
I pyetur se mund të ketë rrezik në këtë marrëveshje, Lekaj tha se ka mundësi të ekzistojë rreziku permanent.
“Prandaj, duhet të jemi shumë të vëmendshëm dhe nuk guxojmë që një marrëveshje e tillë të shkojë shkel e shko. Po ashtu shtrohet pyetja, a do të vijë kjo marrëveshje për ratifikim në Kuvendin e Kosovës?”, theksoi tutje Lekaj.
Ndërkaq, se a do i kërkojnë deputetët kryeministrit Kurti raportim në Kuvendin e Kosovës, Lekaj vlerësoi që Kurti duhet patjetër të raportojë në Kuvend për çdo gjë që ka ndodhur në takim me Vuçiqin.
“Sa i përket raportimit, këto dy vite kemi qenë në terr informativ, sa i përket dialogut dhe marrëveshjeve në fjalë. Patjetër, ne duhet ta ftojmë Kurtin në Kuvendin e Kosovës që të raportojë me gjithë atë që ka ndodhur në takim mes Vuçiqit dhe Kurtit. Sa më transparent që do të jetë, aq më mirë për qytetarët edhe për ne deputetët”, shtoi tutje ai në Tëvë1.
Derisa pas takimit, kryeministri Albin Kurti ka konfirmuar se Kosova dhe Serbia e kanë pranuar propozimin evropian pa ndryshime, teksa ka bërë të ditur se bisedimet për zbatimin e saj do të zhvillohen së shpejti./teve1.info/.