Arbër Fetahu, hulumtues në Grupin për Studime Juridike dhe Politike vlerëson se dakordimi i mbrëmshëm për propozimin evropian e sjell një raport të ri ndërshtetëror mes Kosovës dhe Serbisë.
Fetahu thotë se elementet e marrëveshjes tregojnë për në njohje de fakto të Kosovës nga Serbia.
“Kosovës dhe Serbisë i sjell një raport të ri ndërshtetëror që nuk është i etabluar me njëfarë njohje de jure por ka njëfarë lloj njohje de fakto dhe njihet ekzistenca e Kosovës në kuptimin e politikës së jashtme edhe formalisht nga Serbia apo të paktën nuk pengohet rrugëtimi i Kosovës në arenën ndërkombëtare siç është bërë për vite të tëra nga Serbia sepse janë disa nene dhe garanca që e bëjnë këtë”.
“Besoj që me nenet 1, 2 dhe 3 ku thuhet se të dyja palët do të udhëhiqen nga parimet e Kartës së Kombeve të Bashkuara, ku të dyja palëve u njihet sovraniteti dhe integriteti territorial, ku thuhet se të dyja palët nuk e pengojnë njëra-tjetrën për t’u anëtarësuar. E kemi edhe pjesën e dokumenteve, vulat doganore, pasaportën. Një prej elementeve në të drejtën ndërkombëtare, kur një shtet e njeh pasaportën ndonëse nuk ka notë verbale të njohjes llogaritet në njëfarë formë si njohje de fakto. Normalisht që ka mundësi për interpretime se a është njohje de fakto klasike”, ka thënë Fetahu në emisionin “Ditari” në Tëvë 1.
Duke folur për deklaratat e BE-së se marrëveshja nuk nënkupton njohje de fakto pasi misioni i BE-së është normalizimi i marrëdhënieve Kosovë – Serbi, ai ka thënë se vet normalizimi interpretohet ndryshe nga palët.
“BE-ja përsëri është duke luajtur atë rolin e ambiguitetit sepse normalizim për neve është njohja de fakto, për Serbinë është ajo që e ka mbajtur ende Kosovën brenda Kushtetutës, ndërsa për BE-në është normalizim vet arritja e marrëveshjes”, ka deklaruar Fetahu.
Sipas tij në rrethanat aktuale kjo marrëveshja është më e mira e mundshme.
“Nuk është një marrëveshje përfundimtare me njohje reciproke si ajo çfarë është trumbetuar për vite të tëra por duket që është më e mira e mundshme në kuptimin e kontekstit aktual të dialogut Kosovë – Serbi”, shtoi ai.
