Kryeministri i vendit, Albin Kurti, ka kujtuar masakrën e parë gjatë luftës së fundit në Kosovë, ku në këtë ditë policia serbe vrau dhe masakroi 24 shqiptarë në Likoshan dhe Qirez të Drenicës, prej të cilëve 20 persona ishin civilë.
Kurti, përmes një statusi në Facebook ka rikujtuar historinë e ngjarjeve që kanë ndodhur gjatë ditëve të muajit shkurt, raporton teve1.info.
“Dy javë para kësaj masakre, më 14 shkurt 1998, policët serbë e vranë në vendin e tij të punës në një trafostacion elektrik, 45 vjeçarin Avdullah Nika nga fshati Gllanasellë, për shkak të lidhjeve të tij me UÇK-në. Rreth 12 mijë njerëz morën pjesë në varrimin e tij, më 17 shkurt 1998, ashtu siç mijëra njerëz shkuan për ngushëllime në Gllanasellë gjatë dy javëve të ardhshme”, ka shkruar kryeministri.
Ndërkohë, në ditën e 27 shkurtit, Kurti, ka shkruar se komandanti, Adem Jashari, i kishte ngarkuar me detyrë që të patrullonin në Likoshan, Qirez dhe Gllanasellë, tre shokët e tij, Sahir Jasharin, Sabit Lladrovcin dhe Rasim Kiqinën.
Kurti, mes tjerash ka thënë se pas masakrës së kryer nga policia serbe në Likoshan e Qirez, lufta nuk mund të kishte kthim më pas, që sipas tij, ishte duke u intensifikuar tutje me mijëra të vrarë dhe të rënë dëshmorë.
“Lavdi të vrarëve të masakrës së Likoshanit dhe Qirezit si dhe lavdi të gjithë dëshmorëve dhe të rënëve në rrugën tonë të gjatë për liri!”, ka thënë Kurti.
Të pranishëm në homazhe ishin edhe kryetari i Kuvendit të Kosovës, Glauk Konjufca si dhe Ministrja e Drejtësisë, Albulena Haxhiu.
