Deputeti i Lidhjes Demokratike të Kosovës, Driton Selmanaj, ka paralajmëruar se do ta padis Ambasadorin e Kosovës në Kroaci, Martin Berishaj, për siç tha ai, deklarim të rrejshëm gjatë raportimit në komisionin hetimor për energji.
Selmanaj i cili e kryesonte këtë komision, tha se ambasadori Berishaj ka gënjyer nën betim gjatë raportimit në Komisionin Hetimor për Energjinë në nëntor të vitit të kaluar.
Selmanaj gjatë diskutimit në Kuvendin e Kosovës për çështjen e Berishajt i cili u përfshi në një skandal financiar në Slloveni, tha se ka qenë insistuesi më i madh që të pyes ambasadorin se a është pronar i kompanisë MB Consulting, përmes së cilës dyshohet se ai kishte pranuar 600 mijë euro nga kompania energjetike sllovene GEN-I, dega në Beograd.
“Përgjigja e tij ishe kështu: Po, është një kompani të cilën e kam formuar në vitin 2017 në Mal të Zi. Ajo nuk funksionon që nga viti 2020, nuk ka hyrje e dalje, nuk qarkullon para”, ka thënë deputeti i LDK-së, teksa po lexonte transkriptin nga mbledhja e Komisionit, ku ishte intervistuar Berishaj.
Sipas Selmanaj, më vonë është kuptuar se në vitin 2022 Berishaj ka tërhequr para në Kosovë me arsyetimin për nevojat e biznesit.
“S’po e kuptoj pse gjithë ky zell me mbrojt një person që na ka gënjyer. Ai nënshkroi deklaratën nën betim, ku kërkohej të thotë të vërtetën dhe vetëm të vërtetën, e më pastaj na gënjen, thotë se MB Consulting është shuar në vitin 2020. Unë në cilësinë e kryesuesit të Komisionit kam detyrim kushtetues dhe qytetar ta procedojë kallëzimin penal për Martin Berishaj nesër. Gënjeshtra nuk mund të kalojë”, ka thënë ai.