Në njëvjetorin e hapjes së Tëvë 1, kryeredaktori i këtij televizioni, Zijadin Gashi thotë se ia ka vlejtur angazhimi në këtë projekt.
Teksa tregoi momentet e ditëve të para të transmetimit, Gashi bëri të ditur punën që ishte bërë deri në hapjen e televizionit.
“Dita e parë pas saj, pas 22, ne vendosëm, unë, Agron Halitaj, një gazetar shumë me përvojë, që ato ditë të mos shohim orar, të mos llogarisim se a është e hënë, e diel, apo e martë, të punojmë. Ai starti ka rëndësinë e veçantë. Edhe ne kishim në stok disa tema të realizuara, kjo na krijonte një lloj sigurie që ne të vazhdonim me një komoditet punën tonë, që ne të këshillonim stafin se si do të jetë dita pasuese, ditë pas dite. Duhej të punohej vazhdimisht dhe atë që e kishim praktikuar në këto studio kohë pas kohë, kur dolëm në transmetime live, u realizua shumë më mirë dhe kjo na gëzoi pa masë. Filluam të rrisnim sigurinë në vete si staf…në moment që e krijuam atë siguri që ne jemi në rregull, ne jemi një televizion që faktikisht kemi filluar sot që po hyjmë në konkurrencë me të gjitha televizionet e tjera, pa u dalluar, kjo na krijoi edhe një siguri më të madhe”, deklaroi ai në “Info Nata” në Tëvë 1.
Ai po ashtu potencoi edhe fuqinë që ka media në ditët e sotme si një mbështetje për adresimin e nevojave të qytetarëve.
“Sot e vërej fuqinë e medias jo vetëm në këtë pjesën e mediave sociale, por ne si gazetarë na bie të njihemi me shumë njerëz dhe të kemi kontakte me shumë njerëz, dhe sot kur unë marr thirrje, marr mesazhe, marr në rrjete sociale, më shkruajnë njerëzit dhe kërkojnë ndihmën e televizionit…kjo tregon që faktikisht njerëzit po e shohin televizionin si një mbështetje për adresimin e halleve, nevojave të tyre”, shtoi Gashi.
Gashi bëri të ditur se synimi kryesor i tyre është që pritet të sjellin emisione shumë familjare, “në mënyrë që njerëzit si familje ta ndjejnë veten komod, dhe si familje të përcjellin një emision dhe ta komentojnë bashkë, pa pasur nevojë ta ndërrojnë kanalin”. /Teve1.info/
