Tëvë 1 shënon sot njëvjetorin e hapjes. Me këtë rast, drejtori i televizionit, Dukagjin Maliqi paralajmëroi risi që do i shtohen skemës programore ditëve në vijim.
Maliqi bëri të ditur se shumë shpejt Tëvë 1 do të sjell një serial, prodhim i televizionit, në të cilin do të ketë përmbledhje e përballje kulturash.
Siç thotë ai, duke e shikuar Tëvë 1 “mundesh me mësu diçka”.
“Por nuk do të ndalmi me kaq, do të sjellim risi, do të sjellim vazhdimisht ndryshime, çkado që shikuesi kërkon, ne do të jemi aty. Pa dasht, sigurisht, do të harroj gjatë kësaj kohe të flas për dikë më konkretisht, por në të vërtetë është bërë punë e madhe, është mbushur një programacion me vlera, me materiale të rëndësishme dhe Tëvë1 tu e shiku, mundesh me mësu diçka prej ekranit tonë”, deklaroi ai gjatë emisionit “410”.
Tutje, Maliqi theksoi se stafi i mirë e ka bërë që ta pranojë edhe detyrën e drejtorit.
“Në fakt unë jam gazetar me profesion, edhe e kam vështirë me zgjedh, se stafi shumë i mirë, më ka bë me zgjedh me qenë drejtor, në kuptimin me dashtë pozitën e drejtorit. Po në anën tjetër, profesioni i gazetarit nuk të lë rahat me u ndi, edhe sigurisht udhëheqja e emisionit të debatit, është një diçka profesionale, diçka që e ke mend gjatë dhe e bën më shumë dëshirë”, potencoi drejtuesi i emisionit “Këndi i Debatit” në Tëvë 1.
Tëvë1 është një prej projekteve më të mëdha televizive e mediale në Kosovë, ku mision ka informacionin e drejtë dhe të vërtetë.