Komuna e Prishtinës po mbështet Ukrainën në prag të njëvjetorit të luftës pushtuese të Rusisë.
Tek rrethi i Arbërisë tashmë vendkalimet për këmbësorë dhe rrethojat e trotuareve kanë marrë ngjyrat e flamurit ukrainas.
Drejtori i Shërbimeve Publike, Ilirik Musliu ka treguar për KP se ngjyrosja është bërë gjatë fundjavës, në mbështetje të Ukrainës.
Më 24 shkurt bëhet një vit nga fillimi i luftës së Rusisë në Ukrainë. Shtetet perëndimore kanë dënuar veprimet e Rusisë dhe kanë vendosur sanksione ndaj Moskës.
Nga vendet e rajonit, Kosova, Mali i Zi, Shqipëria, Maqedonia e Veriut dhe Kroacia kanë dënuar sulmin rus ndaj Ukrainës.
Kosova i është bashkuar Shteteve të Bashkuara dhe Bashkimit Evropian, duke vendosur sanksione ndaj Rusisë.
Ndërkaq, Serbia jo vetëm që nuk i ka vendosur sanksione por as nuk e ka dënuar agresionin rus.
