Kryetari i PDK-së, Memli Krasniqi ka thënë se shteti i Kosovës nuk mund të abstenojë nga përgjegjësia që i takon.
Krasniqi në Facebook tha se pas shumë takimeve që ka pasur gjatë javës së Pavarësisë dhe nevojave të shumta që kanë qytetarët e Kosovës, sipas tij, duhet diqka më shumë sesa reflektimi.
I pari i PDK-së, tha se në qeverisjen Kurti nuk po shohim adresim të këtyre nevojave e siç tha ai nuk po shohim madje as përpjekje.
“Ndonëse dje shënuam Ditën e Pavarësisë me ceremoni solemne e me ftesë për reflektim e unitet në të cilin besojmë, përballë këtyre kërkesave të drejta e të duhura të të rinjve e të rejave të Kosovës, duhet diçka shumë më shumë sesa reflektimi. Shteti ynë nuk mund të abstenojë nga përgjegjësia që ka ndaj tyre. Fatkeqësisht, nën qeverisjen e Albin Kurtit, jo vetëm që po shohim abstenim për adresimin e këtyre nevoja, por nuk po shohim as përpjekje. Krejt përkundrazi”, ka thënë ai.
Madje sipas Krasniqit, qytetarët e Kosovës nuk mund të shpresojnë në të ardhme të mirë përderisa siç tha ai, ambasadori Martin Berishaj, merret në mbrojtje përkundër skandaleve.
Teksa theksoi se mungesa e perspektives, si pasojë e një pushteti të paaftë, sipas tij, është duke e zbrazur Kosovën.
“Qytetarët tanë dhe gjeneratat e reja, si ajo e periudhës së pavarësisë, nuk mund të shpresojnë në të ardhme më të mirë, përderisa një Ambasador si Martin Berishaj, që del se është pjesë e skandaleve ndërkombëtare të mafisë energjetike rajonale, jo vetëm që nuk shkarkohet, por merret në mbrojte nga pushteti. Kosova, nuk mund të jetë vend me perspektivë, përderisa pushtetarët strehojnë protagonistë të aferave mafioze.Kosova nuk mund të jetë vend me perspektivë, përderisa inflacioni ju bie si barrë e papërballueshme familjeve kosovare, ndërsa qeveria nuk ka ide se si ta zhbllokojë ekonominë. Nuk mund të ketë të ardhme të sigurt e të qëndrueshme për një vend si Kosova, që ka potencial për të eksportuar energji, e nga keqqeverisja përfundon në terr, ndërsa qytetarët paguajnë faturat më të shtrenjta në rajon. Nuk mund të ketë të ardhme të qëndrueshme e as demokratike, në një vend ku pushteti paragjykon drejtësinë dhe sulmon mediat e lira. Kjo mungesë perspektive, si pasojë e një pushteti të paaftë, sot është duke e zbrazur Kosovën”, tha ai.
Tutje ai shtoi se kjo nuk është e ardhmja që qytetarët e duan për atdheun e tyre.
“E kjo nuk është e ardhmja që qytetarët e duan për atdheun e tyre dhe as e ardhmja për të cilën ata kanë sakrifikuar. E ardhmja e Kosovës duhet të jetë një tregim krejtësisht ndryshe. Jetësimin e asaj të ardhmeje duhet ta nisim tani dhe pa vonesë, së bashku, me dashuri e përkushtim për Kosovën e fëmijëve tanë”, shtoi Krasniqi./teve1.info./
