Prokuroria Speciale e Kosovës ka bërë të ditur se një numër i konsiderueshëm i personave janë intervistuar në cilësi të dëshmitarëve, për rastin e zhdukjes së mostrave të Astrit Deharit në Institutin e Mjekësisë Ligjore
Lajmin për tëvë1.info e ka konfirmuar zëdhënësi i Prokurorisë Speciale të Kosovës, Ekrem Lutfiu.
Ai ka bërë të ditur se për momentin nuk ka ndonjë persona të dyshuar.
“Ndërkaq, për rastin e zhdukjes së provave në çështjen Dehari, ju njoftojmë se Prokuroria Speciale e Republikës së Kosovës, ka intervistuar një numër të konsiderueshëm të personave në cilësi të dëshmitarëve. Po ashtu, ju informojmë se kemi ndërmarr veprime konkrete që do të na ndihmojnë në rrjedhën e procedurës të mëtutjeshme hetimore. Për momentin nuk kemi ende persona të dyshuar në këtë çështje”, tha ai.
Teksa tha se meqë janë ende në fazë të hetimeve, nuk mund të japin informata tjera.
“Duke pasur parasysh se ende jemi në fazën e hetimeve nuk mund të japim informata tjera lidhur më këtë çështje”, tha Lutfiu.
Kujtojmë se, më 8 dhjetor të vitit të kaluar, 12 mostra të Astrit Deharit janë zhdukur nga Laboratori i Toksikologjisë në Institutin e Mjekësisë Ligjore.
Ndërsa ministrja e Drejtësisë Albulena Haxhiu, ka deklaruar se zhdukja e mostrave të ish-aktivistit të Vetëvendosjes, Astrit Dehari nga laboratori i Institutit të Mjekësisë Ligjore, kishte për qëllim dëmtimin e Qeverisë në raport me këtë rast.
Sipas saj, në laboratorin ku janë mbajtur mostrat e Deharit, kanë pasur qasje vetëm tre persona, teksa sipas saj, nëse rasti trajtohet me seriozitet shume lehtë mund të verifikohet se kush është personi që i ka zhdukur ato.
Kurse për këtë rast ministrja Haxhiu dhe zëvendësi i saj kanë dhënë dëshmi para disa ditëve, meqë sipas saj, ata kanë aportuar rastin në Prokurori sapo kemi marrë informatat nga zyrtarët e Institutit të Mjekësisë Ligjore. /teve1.info./
