Kryetari i Partisë Demokratike të Kosovës, Memli Krasniqi së bashku me bashkëshorten dhe fëmijët ka bërë homazhe te varri i veprimtarit të çështjes kombëtare, Adem Demaçi në prag të shënimit të 15-vjetorit të Pavarësisë së Kosovës.
Krasniqi ka treguar se Demaçi ishte personi i vetëm që ishte ftuar nga ish-kryeministri Hashim Thaçi për tu njoftuar për përgatitjet e të gjitha aktiviteteve të shpalljes së pavarësisë më 16 shkurt 2008.
“Adem Demaçi është simboli i sakrificës, guximit dhe atdhedashurisë – karakteristika të cilat mishërojnë përpjekjet e shumë brezave në rrugën e lavdishme të lirisë. E kujtoj si sot, Adem Demaçi ishte një ndër personat e vetëm të cilin ish-Kryeministri Hashim Thaçi e kishte ftuar në ndërtesën e Qeverisë në mbrëmjen e 16 shkurtit të vitit 2008, për të ndarë me të të gjitha përgatitjet finale për Ditën e shpalljes së Pavarësisë – përfshirë edhe prezentimin e flamurit të Kosovës. Ishte një ndër momentet më emocionuese që kisha përjetuar deri atëherë”, ka shkruar Krasniqi, raporton teve1.info.
Ai ka thënë se në nderim të veprës në Prishtinë duhet të ngritet shtatorja e Adem Demaçit.
“Baca Adem nuk është thjesht një emër, por është institucion. Prandaj, kujtesa, respekti dhe mirënjohja historike ndaj personalitetit të tij duhet të tregohet edhe përmes ngritjes së një shtatoreje meritore në Prishtinë. Partia Demokratike e Kosovës do ta merr këtë nismë në Kuvendin Komunal të Prishtinës. Këtë ia kemi borxh Adem Demaçit. Ia kemi borxh Kosovës”, ka shkruar ai.
