Deputetja e Vetëvendosjes, Arjeta Fejza ka thënë se marrëveshjet e nënshkruara nga qeveritë e kaluara nuk mund t’i anulojnë.
Megjithatë sipas saj Vetëvendosjes i mbetet që të japë qëndrime që janë në frymën e ruajtjes së kushtetutshmërisë dhe sovranitetit e ligjshëmrisë së Kosovës.
Duke folur për 6 kushtet e Asociacionit të Komunave me Shumicë Serbe, ajo ka thënë se ato nuk kanë mundur t’i publikojnë më herët përderisa s’ka ekzistuar plani franko-gjerman.
“Jemi në një situatë tjetër, sigurisht që nuk kemi mundur të argumentojmë në 2015 me këto kushte sepse s’ka ekzistuar fillimisht plani franko-gjerman, nuk kanë qenë këto rrethana dhe kushte për të cilat po flasim aktualisht. Ne jemi në rrethana të reja politike dhe nuk ka ndryshuar asgjë në qëndrimin tonë për Zajednicën”, ka thënë Fejza në Ditari në Tëvë 1.
E pyetur nëse do ta sakrifikonin pushtetin për të mos e formuar Asociacion, Fejza është përgjigjur pozitivisht.
“Po dhe mendoj që ky qëndrim ka qenë publik nga ana jonë. Mandej është thënë prej kryeministrit që ne as si pozitë, as si opozitë nuk e pranojmë një formë të tillë të Asociacionit”, ka shtuar ajo.
