Prishtina është ekipi i fundit që është kualifikuar në çerekfinale të Kupës së Kosovës në futboll. Prishtina, të hënën e eliminoi Dukagjinin në 1/8 e finales, në ndeshjen që ishte shtyrë për 24 orë për shkak të fushës së ngrirë.
Dueli i luajtur në stadiumin “Sami Kelmendi” në Lipjan, ka përfunduar me rezultatin 3:1 në favor të Prishtinës, e cila ishte në cilësinë e ekipit vendas. Prishtina luajti më mirë dhe pati më shumë raste shënimi karshi Dukagjinit, i cili në fund të ndeshjes arriti ta shënojë golin e nderit. Skuadra e Prishtinës avancoi në minutën e 9-të me sulmuesin Leotrim Kryeziu, i cili shënoi nga afërsia pas asistimit të amerikanit Jalen Blesa.
Më pas, Blesa shënoi dy golat tjerë për Prishtinën. Fillimisht, dyfishoi epërsinë në minutën e 20-të me kokë dhe pastaj me të filluar pjesa e dytë, realizoi edhe golin tjetër në minutën e 48-të. Në anën tjetër, ishte mesfushori nga Ukraina, Vladyslav Khomutov (77’) që shënoi golin e vetëm për Dukagjinin në këtë takim.
