Gjatë diskutimit në Komisionin për Buxhet ku ministri Murati raportoi lidhur me rritjen e vlerës së faturave të tatimit, Hoti shqetësuese e konsideroi faktin që qytetarët nuk janë informuar me kohë për rritjen e këtyre faturave. Megjithatë, vlerësoi se si proces teknikisht dhe ligjërisht është në rregull.
“Është shqetësuese që qytetarët e kanë faturën dyfish më të lartë. Këtu sot nuk jemi për ta adresuar fajin, mirëpo ajo që më shqetëson mua si ekonomist dhe deputet, është mënyra se si je duke e menaxhuar këtë proces. Fakti që për herë të parë njerëzit e marrin vesh në janar që do u rriten faturat e tatimit në pronë, gjithashtu edhe fakti që në projeksionet buxhetore të komunave për vitin 2023, nuk janë fare të reflektuara rritja e të hyrave komunale për shkak të dyfishimit të ngarkesës tatimore nga tatimi në pronë. Pra ministër, të bëhemi të sinqertë me njëri tjetrin, ti nuk e ke pasur idenë që në janar njerëzve do u dyfishohen faturat në pronë. Teknikisht dhe ligjërisht si proces është në rregull”, theksoi Hoti.
Madje, Hoti konsideroi se zbatimi i ligjit nuk e bën më pak fajtor ministrin Murati sa i përket këtij vendimi, raporton teve1.info.
“Pra, ajo që më shqetëson mua, është që ministri nuk është duke e kryer punën. Ministri nuk është person teknik aty, ministri është aty për ta menaxhuar sektorin e financave publike, e në veçanti kur e kemi krizën më të madhe ekonomike dhe fiskale në 15 vite. Unë nuk e pranoj argumentin që ti nuk ke faj vetëm pse e ke zbatuar ligjin. Ky është shqetësimi i opozitës, nuk jemi duke bërë zhurmë, por vetëm jemi duke i shprehur shqetësimet e qytetarëve”, u shpreh më tej Hoti.
Derisa i bëri thirrje Muratit që sa më shpejtë të gjejë një zgjidhje për qytetarët e Republikës së Kosovës, duke i kërkuar atij që edhe të zotohet për këtë./teve1.info/.
