Haradinaj ka thënë se Masakra e Reçakut mbetet një dëshmi e pakundërshtueshme e gjenocidit dhe spastrimit etnik në Kosovë, teksa ka thënë se kjo masakër nuk duhet harruar e as mohuar, raporton teve1.info
“Përulemi e nderojmë të rënët për liri në të gjithë vendin e veçanërisht viktimat e Masakrës së Reçakut, civilët e masakruar në zemër të Evropës, masakër kjo që shokoi dhe vuri në lëvizje gjithë botën demokratike që me forcë ta ndalte shfarosjen e një populli të tërë. Kjo masakër mbetet një dëshmi e pakundërshtueshme e gjenocidit dhe spastrimit etnik në Kosovë, që nuk duhet harruar dhe as mohuar”, ka shkruar Haradinaj.
Tutje, kreu i AAK-së u shpreh mirënjohës përjetësisht ndaj Ambasadorit amerikan, William Walker, që sipas tij e përkufizoi masakrën si krim kundër njerëzimit.
“Mirënjohës përjetë Ambasadorit amerikan William Walker që e përkufizoi këtë masakër si krim kundër njerëzimit”, ka shkruar Haradinaj.
“Lavdi të rënëve për lirinë e Atdheut!”, shtoi ai.
Kujtojmë se, Kosova përkujton sot 24-vjetorin e Masakrës së Reçakut, ku u vranë mbi 45 civilë të pafajshëm shqiptarë. Ish-shefi i misionit vëzhgues të OSBE-së në Kosovë, ambasadori William Walker, e pati cilësuar Masakrën e Reçakut si krim kundër njerëzimit./teve1.info
