Para dy ditësh Ragmi Mustafi në cilësinë e të parit të Këshillit Kombëtar Shqiptar është njoftuar nga Ministri i Serbisë për Drejtat e Njeriut dhe Pakicave, Tomislav Zhigmanov se afati i konstituimit të udhëheqjes së Këshillit Kombëtar Shqiptar skadon më 13 janar 2023.
Sipas asaj shkrese më 14 janar (nesër) përmbushen kushtet ligjore për futjen e masave të dhunshme për shkak mungesës së një marrëveshjeje për të bërë shumicën dhe bashkëqeverisur me Këshillin Kombëtar Shqiptar.
E për t’i ikur një situate të tillë, kryetari i Këshillit Kombëtar Shqiptar, Ragmi Mustafi ka ftuar një seancë sonte në ora 22:00, shkruan Teve1.info.
“Në emër të Listës Partia për Veprim Demokratik – Ragmi Mustafi me nënshkrimet e 5 anëtarëve dhe sipas ligjit ftova seancën e Këshillit Kombëtar Shqiptar për ora 22:00. Si përpjekje e fundit për të penguar mundësinë që Ministri nga Beogradi të ndërmarr masat e dhunshme”, ka thënë Mustafi.
Nëse nuk arrihet një marrëveshje ndërmjet përfaqësuesve shqiptarë, ministri Zhigmanov pritet të zgjedh drejtuesin dhe 4 antarë të që do ta udhëheqin këtë këshill në afat prej 60 ditë dhe pastaj mund të përsëriten zgjedhjet. /Teve1.info/
