Tifozët e Marokut përjetuan emocione të forta në Botërorin e Katarit. Kombëtarja afrikane zhvilloi ndeshje të mëdha, i surprizoi të gjithë dhe mbërriti deri në fazën gjysmëfinale.Ecuria fantastike krijoi entuziazëm të madh në Marok, ndërkohë që një nga protagonistët kryesorë të “Luanëve të Atlasit” ishte Achraf Hakimi, anësori i djathtë i PSG-së.
24-vjeçari, i cili ka lindur në Madrid, është përballur me një surprizë të bukur në Ksar el-Kebir, qytetin nga vjen mamaja e tij. Stadiumi ka marrë emrin e Hakimit, i cili ishte i pranishëm në ceremoni.
“Jam shumë i lumtur që jam sot me ju. Falënderoj të gjithë qytetin e Ksar el-Kebir. Jam shumë i lumtur që shoh kryetarin e bashkisë dhe gjërat e mira që ka bërë.
Ne punojmë për të mirën e Marokut. Ky është qyteti i nënës sime ku kam kaluar shumë kohë si fëmijë. Faleminderit të gjithëve“, deklaroi mbrojtësi përpara qindra tifozëve.Më pas një koment në rrjetet sociale: “Për mua ishte një privilegj që munda të përuroja stadiumin që mban emrin tim. Është nder i madh të jesh kaq shumë i dashur nga njerëzit e tu.
Ju falënderoj të gjithë ju tifozëve dhe autoritetet marokene. Ky qytet ka një vend të veçantë në zemrën time, si të gjithë ju”, shkroi ylli i kombëtares së Marokut.