Njëherit, Bajrami theksoi se deri më tani ka filluar ndërtimi i vetëm tri çerdheve në Kosovë, ndërkohë që premtimi i Vetëvendosjes ka qenë për 160 çerdhe.
“Ajo çka dua të them është që nuk po reflektojnë as premtimet dhe as programi i Qeverisë. Më 17 maj kur është bërë prezantimi i planit të Qeverisë Kurti, ai ka premtuar që do të ndërtohen 160 çerdhe në Kosovë. Ka premtuar me mijëra banesa sociale, mirëpo sot ato banesa nuk kanë filluar. Sot në Kosovë para dy apo tre muajve janë hedhë themelet e tri çerdheve në krejt territorin e Republikës së Kosovës. Për katër vjet ka premtuar 160 çerdhe. Ka premtuar fondin sovran, ka premtuar që do e ndërpresë privatizimin dhe ne sot javë pas jave nuk kemi valë të privatizimit”, deklaroi Bajrami në emisionin “Këndi i Debatit” në Tëvë1.
Madje, ajo tha se LDK edhe kur ka hyrë në koalicion për herë të parë, përsëri nuk e ka pranuar Fondin Sovran.
Tutje, Bajrami tregoi edhe planin e Performances së Ndërmarrjeve për vitin 2023, derisa shtoi se të njëjtat janë në humbje që nga koha kur VV ka vendosur bordet e tyre.
“Performanca e ndërmarrjeve për vitin 2023, është paraparë ta ndihmojë Telekomin dhe ndërmarrjet tjera publike. Derisa të njëjtat, tash me menaxhmentin dhe me borde të vendosura nga ana e Vetëvendosjes, janë duke performuar me humbje. Raportet e auditorit të ndërmarrjeve publike, janë shumë më të këqija në këtë vit, se sa në vitin e kaluar”, tha tutje Bajrami.
Ndërkaq, sa i përket Ligjit të Pagave, Bajrami u shpreh se ky është një instrument i cili mund të përdoret edhe në fushata elektorale./teve1.info/.
