Edhe Etrit Berisha pritet që në merkaton e janarit të ndryshoj ambient. Gardiani i Shqipërisë është në kuotën e zero minutave këtë sezon me Torinon dhe ndjehet i zhgënjyer nga sjellja e stafit teknik dhe klubit “Granata”.
Ndaj, 33-vjeçari është duke studiuar mundësitë që ofron merkato dhe së fundmi një alternativë është paraqitur. Spezia është në “gjurmët” e Berishës duke qenë se aktualisht ish-skuadrës së Rey Manajt i janë dëmtuar dy portierët Zoet dhe Dragowski.
Sipas Tuttosport, zgjedhja më e mirë për drejtuesit e Spezias është Berisha, që ofron eksperiencë të mjaftueshme mes shtyllave për shkak se prej vitesh portieri është pjesë e Serie A duke koleksionuar paraqitje me Atalantën, Lazion, SPAL e së fundmi Torinon.
Sa i takon Spezias, edhe në këtë sezon objektivi i skuadrës është mbijetesa teksa aktualisht skuadra renditet në vendin e 17-të me 14 pikë.
