Kështu, nga 30 shtatori, shtetasit e Federatës Ruse, përfshirë edhe ata me pasaporta diplomatike të lëshuara nga shtetet e Zonës Shengen, obligohen që të pajisen me vizë të Republikës së Kosovës për hyrje transit dhe për qëndrim në territorin e vendit.
Tëvë1, ka pyetur Ministrinë e Punëve të Jashtme nëse përgjatë këtyre muajve është regjistruar ndonjë aplikim për vizë nga ana e tyre.
Megjithatë, sipas këtij dikasteri qeveritar deri më tani nuk është paraqitur as edhe një rast kur shtetasit rusë kanë kërkuar të pajisen me vizë të Kosovës.
“Që nga data e vendimit me anë të së cilit shtetasve rus ju kërkohet që të pajisen me viza të Republikës së Kosovës me rastin e hyrjes/kalimit dhe qëndrimit në Kosovë (30.09.2022), dhe deri tani në sistemin e vizave të Republikës së Kosovës nuk është regjistruar asnjë aplikim për vizë nga shtetasit rusë”, thuhet në përgjigjen e MPJD-së.
Megjithatë, sipas MPJD-së, shtetasve rus u lejohet hyrja, nëse të njëjtit kanë leje qëndrimi valide të lëshuar nga Republika e Kosovës.
“Nëse shtetasit rusë janë të pajisur me leje qëndrim të RKS-së, atëherë të njëjtit i lejohet hyrja në Republikën e Kosovës përsëri, për aq kohë sa leje qëndrimi i tyre është valid”, thuhet më tej në përgjigjen e MPDJ-së.
Kujtojmë, se ky vendim ishte pjesë e masave ndëshkuese që Kosova i pati ndërmarrë ndaj Rusisë, për shkak të agresionit në Ukrainë.
Më herët qytetarëve rusë me pasaporta diplomatike dhe zyrtare u lejohej hyrja, transiti dhe qëndrimi deri në 15 ditë në territorin e Republikës së Kosovës, pa vizë.
Kronika e gazetares Lendrina Kodrolli.
