Kryetari i Këshillit Kombëtar Shqiptar atje, Ragmi Mustafi ka thënë se shteti serb po e mban Luginën në gjendje të jashtëzakonshme.
“Në Luginën e Preshevës ka një kohë të gjatë që shtimi i forcave të sigurisë ka qenë i jashtëzakonshëm dhe me këtë shtim të forcave, vazhdimisht e kanë mbajtur një gjendje të jashtëzakonshme, e që kjo gjendje ka larguar edhe investitorët e mundshëm”, tha ai.
Tutje Mustafi, ka thënë se mes Kosovës dhe Luginës, ndodhën afër 50 baza policore e ushtarake serbe.
“Rreth brezit kufitar mes Kosovës dhe Luginës së Preshevës, janë vendosur 20 mini-baza të Njësitit Special të Xhandarmerisë dhe 28 mini-baza të ushtrisë e madje në anën tjetër mes Preshevës dhe Bujanovcit, është vendosur edhe një nga baza me të mëdha”, shtoi ai.
Por, me këto deklarata të Mustafit, nuk po pajtohet analisti nga Presheva, Valon Arifi.
“Ka pasur forca të shtuara në kufi me Kosovën, pra në Rashkë, ku edhe veproj për shkak të punës, por në Luginën e Preshevës, nuk ka forca të shtuara të theksuara, përveç bazës që është aty nga viti 2004”, deklaroi Arifi.
Në fund, Arifi thotë se ka kohë që në Luginën e Preshevës nuk ka problem të sigurisë, sikurse në Veri të Kosovës.
Kronika e gazetarit Fidan Zejnullahu.