Por, dynerët që i përgatiti të hënën, Abtul Fettah Kuru, nuk i ka për t’i shitur.
Kjo pasi ka 17 ditë që këtë ushqim, po ua shërben zyrtarëve policorë, këtu në Lagjen e Boshnjakëve në Veri të Kosovës.
Këta të fundit janë pozicionuar këtu që nga dita e parë e ngritjes së barrikadave.
Fettah Kuru ka treguar edhe arsye se pse po e bën këtë.
“Këta policë po rrinë këtu për neve gjatë gjithë kohë. Unë këtë e bëj për respekt ndaj Policisë së Kosovës, edhe këta janë të martuar dhe kanë familjet e tyre. Këta policë nuk kanë nevojë për neve, por ne kemi dëshirë t’i respektojmë”, tha ai për Tëvë1.
Turku ka 5 vjet që e ka hapur këtë dyqan në Lagjen e Boshnjakëve.
Ndërsa thotë puna në këto ditë të barrikadave ka rënë shumë.
Por, kjo nuk e ndali atë që policëve t’iu dal në ndihmë në orët e vona të natës.
“Ka raste kur kam ardhur edhe gjatë natës, sepse koha tani është e ftohtë. Jam munduar të iu ofrojë ndonjë qaj të nxehtë, apo çkado që kam mundësi. Ndonjëherë mjafton ta hapi lokali që të futën brenda e të ngrohën, pasi tani po mban mot i ftohtë”, shtoi ai.
Por, buka nuk është e gjitha që Fettah Kuru po ia ofron atyre që po kujdesën për sigurinë e banorëve këtu.
Të hënën ky u pa teksa iu shërbeu edhe qaj policëve në rrugë.
Ndryshe, janë bërë 17 ditë që kur protestuesit serbë ngritën barrikadat në rrugët që shpijnë drejt pikave kufitare në Bërnjak e Jarinjë.
Kronika e gazetarit Fidan Zejnullahu.