Me të gjitha votat për anëtarët prezent e votuan Projektligjin për ratifikimin e Marrëveshjes së Kredisë për projektin “Korniza e qyteteve të gjelbërta 2 dritarja 2- Efiçienca e energjisë në ndërtesa publike në Prishtinë” ndërmjet Republikës së Kosovës dhe Bankës Evropiane për Rindërtim dhe Zhvillim.
Po ashtu, në komision i miratua edhe Projektligji për ratifikimin e Marrëveshjes së Kredisë për projektin Efiçienca e energjisë në ndërtesa publike në Prizren” ndërmjet Republikës së Kosovës dhe Bankës Evropiane për Rindërtim dhe Zhvillim.
Ministri i Financave, Hekuran Murati, tha se marrëveshja e kredisë për efiçiencë në komunë e Prishtinës, kap vlerën 5 milionë euro, përderisa 1 milion janë grant.
Murati tha se kredinë e kthejnë vet komunat.
“Ky projekt kap vlerën rreth 6 milionë, 5 milionë është kredi nga BERZh-i, ndërsa 1 milion është grant. Periudha e kthimit parashihet deri në vitin 2032. Marrë parasysh nevojën për ta pasur këtë projekt, iu ftoj ta miratoni”, tha Murati.
Sipas tij, një projekt i tillë është paraparë edhe në Prizren.
“Dallimi i vetëm te datat e kthimit. Kushtet janë të ngjashme. Mënyra se si janë zgjedhur këto dy komuna është për shkak të madhësisë së komunave. Kredinë e merr niveli qendror, ndërsa niveli komunal e paguan. Kredinë e kthen komuna. E kemi dakordimin nga kryetarët e komunave. Ne kemi marrë procedurat e nevojshme, ata mund të tërhiqen nga kredia”, deklaroi Murati.
