Përmes një statusi në Facebook, Hoti tha se përveç këtyre seancave, Kuvendi i ka në gjysmë edhe disa seanca tjera plenare të papërfunduara nga sesioni vjeshtor.
Sipas Hotit, shumica në Kuvend nuk ka bashkëpunim me opozitën derisa tha se kjo mazhorancë është në Parlament vetëm për ta ngritur dorën kur kërkohet, pa u marrë me përmbajtjen.
“Agjenda e sotme e Kuvendit, me tri seanca njëra pas tjetrës, është tallje me temat që diskutohen dhe me ata që preken nga këto tema.
Ora 10:00: Ligji për pagat dhe ligji për zyrtarët publik, që prekin jetën e 85 mijë zyrtarëve dhe familjeve të tyre.
Ora 12:00: “Strategjia e energjisë 2022-2031”, tema më e rëndësishme e dekadës për secilin shtet, për qytetarët dhe për bizneset.
Ora 13:00: Seancë e re me një marrëveshje ndërkombëtare për kredi, shtatë projektligje, debati për raportin e Komisionit Evropian dhe një raport për një agjenci”, tha ndër të tjera Hoti.
