Sveçla thotë se “lajmet” e porositura se kinse Policia e Kosovës ka lista mbi të cilat po arreston ish-policët po përdoren si mjete për të arsyetuar pretendimet e hapura territoriale të Serbisë.
Sipas tij, nuk ka lista të tilla dhe nuk përpilojnë aso listash.
“Fushata dezinformuese e Beogradit për të arsyetuar veprimet kriminale nuk ka të ndalur. ‘Lajmet’ e porositura se kinse Policia e Kosovës ka lista mbi të cilat po arreston ish-policët, si pjesë e orkestruar e fushatës dezinformuese, po përdoren si mjete për të arsyetuar pretendimet e hapura territoriale të Serbisë, barrikadat dhe për të frikësuar qytetarët tanë serb. Nuk ka lista të tilla. Ne nuk përpilojmë aso listash. Në Republikën tonë demokratike, prokuroria që ndjek krimin është degë tjetër e pushtetit prej policisë që zbaton ligjin e urdhrat dhe prej Ministrisë së Punëve të Brendshme që është degë e ekzekutivit”, ka shkruar ai në një postim në Facebook.
Po ashtu, Sveçla tha se lajmi për ish-policin e arrestuar në Mitrovicë vërteton edhe njëherë nevojën që të hiqen menjëherë barrikadat.
“Fushata dezinformuese se një ish-polic në Mitrovicën e Veriut është arrestuar dhe se janë penguar punonjësit e elektrodistribucionit, vërteton edhe njëherë nevojën që barrikadat duhet të hiqen menjëherë dhe se normaliteti duhet të kthehet sa më parë në këtë zonë. Policia e Kosovës do të zbatojë urdhrat e organeve të drejtësisë dhe do të vazhdojë të jetë vigjilente në ruajtjen e sigurisë publike dhe luftimin e krimit në çdo kohë”, ka thënë ai. /Teve1.info/
