Cristiano Ronaldo ka thënë se ëndrra e tij për të fituar Kupën e Botës ka përfunduar të shtunën. Kështu ai ka konfirmuar se nuk do të luajë më për Portugalinë në Kupën e Botës. Portugalia u mposht nga Maroku në çerekfinale, ndërsa fundi i Kupës së Botës nuk ishte ai që shpresohej nga Ronaldo, njëri prej më të mëdhenjve në histori.
“Ta fitoj Kupën e Botës për Portugalinë ishte ëndrra ime më e madhe dhe më ambiciozja. Për fat, kam fituar shumë tituj në nivelin ndërkombëtar, duke përfshirë ata për Portugalinë. Por ta vendos emrin e vendit tonë në nivelin më të lartë në botë ishte ëndrra ime më e madhe. Kam luftuar për këtë. Kam luftuar fuqishëm për këtë ëndërr. Në pesë paraqitjet në Botëror përgjatë 16 vjetëve, gjithnjë përkrah lojtarëve të mëdhenj dhe i përkrahur nga miliona portugezë, unë kam dhënë çdo gjë. Kam lënë çdo gjë në fushë. Asnjëherë nuk ia kam kthyer shpinën luftës dhe asnjëherë nuk kam hequr dorë nga ëndrra”, ka shkruar Ronaldo të dielën në një postim në rrjetet sociale.
Ai ka folur edhe për shkrimet dhe për spekulimet e shumta të bëra së fundi.
“Por për fat të keq kjo ëndërr përfundoi dje. Nuk ia vlen të reagoj me nxitim. Vetëm dua që të gjithë ta dinë që është thënë shumë, është shkruar shumë, është spekuluar shumë. Por dedikimi im për Portugalinë nuk ka ndryshuar. Kam qenë gjithnjë një person më shumë që lufton për qëllimin e secilit. Unë nuk do t’ia ktheja asnjëherë shpinën bashkëlojtarëve dhe vendit tim. Tani për tani nuk ka asgjë më shumë për të thënë. Faleminderit Portugali. Faleminderit Katar. Ëndrra ishte e bukur derisa ka zgjatur. Tani është koha të jem një këshilltar i mirë dhe të lejoi secilin që të nxjerr konkluzionet e tij”, ka shkruar Ronaldo.