Kështu u deklarua Osmani pas takimit që pati me krerët e partive politike, raporton Teve1.info
Osmani tha se për këtë vendim ka pasur konsensus të plotë mes partive politike dhe se është marrë parasysh edhe raporti i dërguar dje në Presidencë nga Komisioni Qendror i Zgjedhjeve.
“Në mënyrë që të sigurojmë pjesëmarrje sa më të madhe të qytetarëve në këto zgjedhje, vëzhgim nga institucionet vendore dhe ndërkombëtare, siguri për të gjithë qytetarët pa dallim, si dhe kohë të mjaftueshme për institucionet e sigurisë që të bëjnë edhe përpjekje e të ndërmarrin veprime shtesë për rend dhe ligj në veri në vendit, vlerësoj që shtyrja është e nevojshme”, tha ajo.
Ajo ka shtuar se kishte kontaktuar BE-në për t’i kërkuar mbështetje për mbikëqyrjen e zgjedhjeve në veri, por thotë se ata i kishin bërë të ditur se për shkak të afatit të shkurtër kohor, nuk do të kishin mundësi të marrin pjesë.
Po ashtu, presidentja Osmani deklaroi se sonte ose nesër më së voni, tregohet data e saktë se kur do të mbahen zgjedhjet në prill.
Zgjedhjet në veri paraprakisht ishte paraparë të mbaheshin më 18 dhjetor, pas dorëheqjes së kryetarëve të komunave veriore një muaj më herët. /Teve1.info/
