Në një përgjigje për Tëvë1 nga Ministria e Punëve të Jashtme të Norvegjisë kanë thënë se janë në dijeni për vdekjen e Artan Zymberit dhe të njëjtit potencuan se autoritetet lokale janë përgjegjëse për kushtet e burgjeve në Serbi dhe sigurinë e të burgosurve.
“Ministria e Punëve të Jashtme të Norvegjisë është në dijeni për vdekjen e një shtetasi norvegjez në Serbi. Shërbimi i Jashtëm Norvegjez njoftoi të afërmit dhe ofroi asistencë konsullore për familjen. Autoritetet lokale janë përgjegjëse për kushtet e burgjeve në Serbi, duke përfshirë shëndetin dhe sigurinë e të burgosurve. Çdo pyetje në lidhje me rrethanat e vdekjes duhet t’u drejtohet autoriteteve serbe”, thuhet në përgjigjen e tyre.
Sipas MPJ-së së Norvegjisë, Shërbimi i Jashtëm nuk mund t’i komentojë çështjet konsullore të askujt përveç atyre që janë të përfshirë drejtpërdrejt.
“Për shkak të legjislacionit norvegjez për detyrën e fshehtësisë, Shërbimi i Jashtëm nuk është në gjendje t’i komentojë çështjet konsullore askujt tjetër përveç atyre që janë të përfshirë drejtpërdrejt”, kanë thënë për Tëvë1, nga MPJ të Norvegjisë. /Teve1.info/
